කර්මාන්ත හිමියනි,ඔබගේ කර්මාන්තය සඳහා පරිසර ආරක්ෂණ බලපත්‍රයක් ලබා ගෙන තිබේද?
- පාරිසරික ආරක්ෂණ බලපත්‍රයක් යනු කුමක්ද?
පරිසර ආරක්ෂණ බලපත්‍රයක් යනු කර්මාන්තකරුවන් විසින් තම කර්මාන්ත ක්‍රියාවලිය පරිසර හිතකාමී ලෙස පවත්වාගෙන යාම පිළිබඳව බලපත්‍රය දෙන ආයතනය හා කර්මාන්තකරු අතර ඇති කරනු ලබන නීතිමය සම්බන්ධතාවයක් සහිත ලියවිල්ලකි. එමෙන්ම පරිසර ආරක්ෂණ බලපත්‍ර ක්‍රමය ශ්‍රී ලංකාවේ පරිසර ආරක්ෂණය සඳහා යොදා ගනු ලබන ප්‍රධාන නෛතික උපාය මාර්ගයකි. කර්මාන්ත ක්‍රියාවලීන් හේතුවෙන් සිදු වන පරිසර දුෂණය පාලනය කිරීම සඳහා පරිසර ආරක්ෂණ බලපත්‍ර ක්‍රමය යොදා ගනු ලැබේ. පරිසරයත් සංවර්ධනයත් අතර සමානතාවයක් ඇති කිරීමට මෙමගින් ලැබෙන මෙහෙය ඉතා වැදගත් වේ.
- පරිසර ආරක්ෂණ බලපත්‍රයක් නොමැතිව කර්මාන්ත පවත්වා ගෙන යාම හා එමඟින් ජාතික පාරිසරික පනත යටතේ ප්‍රකාශ කර ඇති ප්‍රමිති හා උවමනා වලට අනුකූල නොවන ලෙස අපද්‍රව්‍ය බාහිර පරිසරයට බැහැර කිරීම, තැන්පත් කිරීම හෝ විමෝචනය, වර්ෂ 2000 ක් වු අංක 53 හා 1988 අංක 56 දරණ පනත් වලින් සංශෝධිත 1980 අංක 47 දරණ ජාතික පාරිසරික පනත යටතේ දඩුවම් ලැබිය හැකි වරදකි.
පරිසර ආරක්ෂණ බලපත්‍රයක් ලබා ගැනීමට සැපයිය යුතු ලේඛන
- සම්පුර්ණ කරන ලද ඉල්ලුම්පත්‍රය.
- ඉඩමේ ඔප්පුවේ පිටපතක්.
- අනුමත කරන ලද ඉඩමේ පිඹුරුපතේ පිටපතක්.
- අනුමත ගොඩනැගිලි සැලැස්මේ පිටපතක්.
- කර්මාන්ත භූමියට ප්‍රවිශ්ඨ විය හැකි මාර්ග සටහනක්.
- ගොඩනැගිලි අනුකූලතා සහතිකයේ පිටපතක්.
- අදාළ වර්ෂයේ වෙළඳ බලපත්‍රයේ පිටපතක්.
- කර්මාන්ත ක්‍රියාවලියේ ශබ්දය/ ගන්ධය/ අපවිත්‍ර ජලය/ අපවිත්‍ර ද්‍රව්‍ය වලින් පරිසරය දුෂණය වැළැක්වීමට ගෙන ඇති ක්‍රියාමාර්ග.
- ඔබ විසින් නියමිත පරීක්ෂණ ගාස්තු ගෙවන ලද අයදුම්පත ප්‍රාදේශීය සභාවට භාර දුන් පසු පරීක්ෂණ කණ්ඩායම විසින් කර්මාන්ත පරීක්ෂා කර බලා, අනතුරුව එම වාර්තාව පරිසර බලපත්‍ර සම්බන්ධ තාක්ෂණ කමිටුවට යොමු කර අනුමැතිය ලබා දුන් පසු, ඔබ වෙත පරිසර ආරක්ෂණ බලපත්‍රයක් ලබා දීමට කටයුතු කරනු ඇත.
- බලපත්‍ර ගාස්තු අවුරුදු 03 ක් සදහා රු. 5757.48 ක් ගාස්තුවක් අය කරනු ලැබේ. නැවත ඔබ විසින් පරිසර ආරක්ෂණ බලපත්‍රයේ වලංගු කාල සීමාව අවසන් වීමට මාස 03 කට පෙරාතුව බලපත්‍රය අලුත් කිරීම සඳහා ප්‍රාදේශීය සභාව වෙත අයදුම් කළ යුතුය. එසේ නොවන අයදුම්පත් සඳහා බලපත්‍ර ගාස්තුවට අමතරව පරීක්ෂණ ගාස්තුවක් ද ගෙවීමට සිදු වන බව කාරුණාවෙන් සලකන්න.
‘‘සෑම මිනිස් ක්‍රියාකාරකමක් සඳහාම අප විසින් නීති රීති රෙගුලාසී පනවනු ලබන්නේ අප ජීවත් වන පරිසරය ආරක්ෂා කිරීමටත් මතු පරපුර සඳහා සුරක්ෂිත වට පිටාවක් උරුම කර දීමටත්ය”
තිස්සමහාරාම ප්‍රාදේශීය සභාව
